Actividá medioambiental pa escolinos n’Aviles

Ye un placer pa nós poder dicivos que güei ficimos nuesa primera actividá n’asturianu. La Estaya de la Llingua d’Avilés organizó esta mañana una ruta medioambiental pa escolinos del conceyu na que contó con EcoAsturias pa da-yos a los neños les esplicaciones pertinentes.

Prestonos pela vida poder dicir carbayu, texu, bidul y falar de les milenta lleendes que ñacen a la solombra de los arboles d’esti xardín francés allugáu nel centru la ciudá. Por si nun lo conocéis, el parque Ferrera ye’l mayor pulmón d’Avilés, asitiáu ente les cais de Rivero, Galiana, Cervantes y la Casa Cultura del Conceyu y con los sos 84.614 m2 ye’l parque más grande de la villa.

 

Parque Ferrera

Parque Ferrera

Aprovechando que ya ta bien cerca’l Domingu Ramos recordamos que la caña Lloréu que entovía atopamos adornando cases per eses feches, usose dende antiguo n’Asturies pa quitar el mal de güeyu. Amás una caña de lloréu colgando nuna casa indicaba que taben espichando sidra y que les demás teníen d’esperar pa facelo. Naguamos tener otra oportunidá pa cuntar estes y otres hestories n’un sitiu tan afayadizu como’l Parque Ferrera y n’asturianu.